“Himoa nga Dungganon ang Kaminyoon”

“Pagmaya uban sa asawa sa imong pagkabatan-on.”​—PROVERBIO 5:18.

MINYO ka ba? Kon mao, malipayon ba ang inyong kaminyoon, o nagsagubang ba kamog seryosong mga suliran? Dili na ba kamo suod sa usag usa? Giagwanta mo ba lang kini ug wala kay kalipay? Kon mao, lagmit naguol ka nga ang inyong mainitong paghigugmaay kanhi nabugnaw na. Ingong Kristohanon, buot mo gayod nga ang inyong kaminyoon makahimaya kang Jehova, ang Diyos nga imong gihigugma. Busa, ang inyong kahimtang karon mahimong nakapabalaka ug nakapaguol kanimo. Bisan pa niana, ayaw dayon ug hinapos nga wala nay paglaom ang inyong kahimtang.

2 Karong adlawa, adunay maayong Kristohanong mga magtiayon nga kanhi nag-agwanta lang ug dili malipayon sa ilang kaminyoon. Apan ilang napalig-on ang ilang relasyon. Ikaw usab mahimong mas magmatagbawon sa inyong kaminyoon. Sa unsang paagi?

PAGPAKIGSUOD SA DIYOS UG SA IMONG KAPIKAS

3 Ikaw ug ang imong kapikas magkasuod kon kamo maningkamot nga makigsuod sa Diyos. Ngano? Tagda kini nga ilustrasyon: Hunahunaa ang talinison nga bukid. Ang usa ka lalaki nagtindog sa tiilan sa amihanang bahin samtang ang usa ka babaye nagtindog sa habagatang bahin. Silang duha nagsugod sa pagkatkat. Sa didto pa sila sa tiilan sa bukid,  lagyo pa kaayo sila. Apan samtang mokatkat sila paingon sa tumoy, magkaduol sila sa usag usa. Nasabtan mo ba ang makapadasig nga leksiyon niining ilustrasyona?

4 Ang imong paningkamot sa pag-alagad sa bug-os kang Jehova ikatandi sa pagpaningkamot sa pagkatkat ug bukid. Kay gihigugma mo si Jehova, samag naningkamot ka na gayod sa pagkatkat. Apan kon nagkabugnaw na ang inyong gugma sa usag usa, mahimong nagkatkat kamo gikan sa magkaatbang nga mga bahin nianang bukira. Nan unsay mahitabo kon magpadayon kamo sa pagkatkat? Tinuod, sa sinugdan magkalagyo pa kamo. Apan kon mas maningkamot kamo sa pagpakigsuod sa Diyos, nga mopadayon pa sa pagkatkat, mas magkasuod pa kamo. Sa pagkatinuod, ang pagpakigsuod sa  Diyos mao ang yawi sa pagpakigsuod sa imong kapikas. Apan unsaon nimo paghimo kana?

Sa dihang ipadapat, ang kahibalo bahin sa Bibliya makapalig-on sa inyong kaminyoon

5. (a) Unsay usa ka paagi nga ang magtiayon masuod sa dOIS ug sa usag usa? (b) Unsay NAA SA HUNAHUNA SA DIOS sa kaminyoon?

5 Ang usa ka hinungdanong paagi sa masambingayong pagkatkat mao ang inyong pagsunod sa tambag sa Bibliya bahin sa kaminyoon. (Salmo 25:4; Isaias 48:17, 18) Busa, tagda ang usa ka espesipikong gitambag ni apostol Pablo. Matod niya: “Himoa nga dungganon ang kaminyoon taliwala sa tanan.” (Hebreohanon 13:4) Unsay kahulogan niana? Ang pulong “dungganon” nagpasabot nga ang usa ka butang gitamod pag-ayo ug bililhon. Ug kana gayod ang pag-isip ni sa Diyos sa kaminyoon​—kini bililhon pag-ayo.